Kryeministri i vendit, Albin Kurti, ka premtuar se do t’i presë në takim zyrtar menaxhmetin e Policisë së Kosovës, së bashku me përfaqësuesit e Njësisë Speciale, për t’i diskutuar kërkesat e tyre.
Kryetari i Sindikatës së Policisë, Imer Zeqiri, vlerësoi që do ishte pozitive të fillohet me realizimin e një apo dy kërkesave për t’u vazhduar më tutje, teksa shtoi që sindikata ka mirëpritur reflektimin e Kurtit lidhur me pakënaqësitë e tyre.
“Ajo që u arrit si marrëveshje të takohen me Kurtin, pavarësisht se kush do të marrë pjesë aty, do të kemi një reflektim pozitiv dhe një fillim të plotësimit të kërkesave në Policinë e Kosovës. Le të fillojnë me realizimin e një kërkese, pavarësisht cilës kërkesë do t’i jepet prioritet, ta kalojnë atë dhe pastaj të vendosim një afat kohor se kur do të realizohen kërkesat tjera. Do të ishte pozitive të fillojnë me realizimin e një apo dy kërkesave, që pastaj të vazhdojmë tutje. Ishte një reflektim pozitiv, në si sindikatë e përkrahim këtë reflektim”, potencoi Zeqiri në emisionin “Ditari”.
Më tej, Zeqiri tregoi që ende s’ka informacione në cilën ditë do të mbahet takimi me Kurtin.
“Takimi besoj do të ndodhë në javën e ardhshme, mirëpo nuk është caktuar dita, s’kemi informacione në cilën ditë do ta caktojë Kurti takimin me përfaqësuesit e Policisë dhe të Njësisë Speciale. Të gjitha kërkesat që janë paraqitur, kanë qenë kërkesa të mëhershme të cilat i kemi paraqitur edhe ne si sindikatë. Jo vetëm me shtesat e rrezikshmërisë, por edhe me kërkesat tjera që i kemi pasur, janë të pakënaqur të gjithë pjesëtarët e Policisë së Kosovës, pa dallim, qofshin ata zyrtarë, apo pjesa e stafit civil”, shtoi tutje Zeqiri në Tëvë1.
I pyetur se a do të jetë pjesë e takimit, Zeqiri tha se s’do ishte në rregull në qoftë se nuk ndodhë një gjë e tillë.
Pjesëtarët e Njësitit Special Intervenues, njësiti më elitar i Policisë së Kosovës, kanë protestuar para ndërtesës së Qeverisë të Kosovës më 1 nëntor, me kërkesën kryesore që rrezikshmëria në punë të caktohet në 50 përqind të pagës bazë. /teve1.info/.
