Pa përfunduar ende edicioni aktual në Superligën e Kosovës në basketboll, skuadra e Bashkimit ka nisur punën për edicionin 2024/25.
Lejson Zeqiri, Altin Morina e Samir Zekiqi do të jenë pjesë e skuadrës së Bashkimit për edicionin 2024/25.
Skuadra nga Prizreni, të mërkurën i ka zyrtarizuar të tre basketbollistët, të cilët kanë firmosur kontrata njëvjeçare me klubin.
Në fakt, të tre lojtarët ishin pjesë e Bashkimit këtë edicion dhe ishin ndër kryesorët në ekip. Zeqiri pati një mesatare prej 16 pikëve, kapiteni Morina luajti me 10 pikë, 4 kërcime e 5 asistime, ndërsa Zekiqi shtoi 9 pikë e 4 kërcime për ndeshje.
Bashkimi stinorin e rregullt në elitën e basketbollit kosovar këtë edicion e mbylli në pozitën e gjashtë, ndërsa u eliminua në serinë çerekfinale të play-offit nga Golden Eagle Ylli.
