Analisti Adrian Zeqiri ka komentuar fjalimin e Albulena Haxhiut pas marrjes së detyrës si kryetare e Kuvendit të Kosovës, duke e vlerësuar si një fjalim të mirë, por duke thënë se ai fjalim ishte gjithëpërfshirës dhe brenda kornizave partiake të LVV-së.
Sipas Zeqirit, LVV ka pasur një shkollë politike jashtëzakonisht të suksesshme, ku anëtarët e rinj, përfshirë Haxhiun, janë formuar në ideologjinë dhe terminologjinë e partisë.
Ai theksoi se përpjekjet për zgjedhjen e kryesuesit të Kuvendit në mënyrë jo kushtetuese vitin e kaluar janë humbur, por sipas tij propaganda ka arritur qëllimin e saj, duke e bërë luftën politike një mjet legjitim për partitë.
Zeqiri shtoi se eksponentët e LVV-së punojnë brenda direktivave të partisë dhe komisionariatit politik të saj, duke i dhënë fjalës së Haxhiut një kuadër të qartë dhe të strukturuar.
“Aq shumë jemi lodh, opinioni publik e një vit debate nëpër studio me orë të tëra, 60 herë është tentua me u bë zgjedhja e kryesuesit të parlamentit në mënyrë jo kushtetuese në vitin e kaluar, krejt këto humbin, propaganda e arriti qëllimin e vet, do të thotë lufta politike është legjitime për partitë politike. Fjalimi i Albulena Haxhiut pas marrjes së detyrës si kryetare e Kuvendit, ishte një fjalim i mirë, por shkolla politike sidomos në vitet e hershme të ekzistencës së LVV-së e ka pasur një shkollë politike jashtëzakonisht të suksesshme, ku njerëzit e rinj duke e përfshirë Albulena Haxhiun janë shkolluar në terminologjinë e LVV-së në ideologjinë e VV-së. Fjalimi i Albulena Haxhiut, ishte gjithëpërfshirës, nuk duhet të harrojmë se eksponentët e LVV-së punojnë strikt brenda kornizave partiake dhe direktivave të cilët vijnë prej komisionariatit politik të LVV-së”, ka deklaruar Zeqiri në emisionin “Ditari” në tëvë1.
