Deputeti i Lidhjes Demokratike të Kosovës, Armend Zemaj, është përfshirë në një incident fizik me një qytetar, gjatë zhvillimit të një interviste publike sot me gazetarin Astrit Gashi.
Sipas Gashit, ngjarja është regjistruar nga kamerat dhe për të është njoftuar Policia e Kosovës, e cila tashmë ka marrë pamjet për hetim.
Pas incidentit, Zemaj ka reaguar përmes një postimi në rrjetet sociale, ku ka shprehur keqardhje dhe ka kërkuar falje publike, duke theksuar se veprimi i tij nuk përfaqëson parimet e tij personale dhe politike.
“Gjatë një interviste publike ndodhi një situatë e papritur dhe e pakëndshme. Një qytetar, nuk e di nëse ishte rastësisht apo me qëllim, më ofendoi dhe më provokoi verbalisht me fjalë të papranueshme. Reagova në afekt dhe në vetëmbrojtje, gjë që nuk përfaqëson as bindjet e mia personale, as parimet që përfaqësoj si deputet. Dhuna, në asnjë formë, nuk është zgjidhje e drejtë. Për këtë arsye, kërkoj falje publike dhe shpreh keqardhje të sinqertë”, ka shkruar Zemaj.
Deputeti i LDK-së ka shtuar se rasti do t’i shërbejë si mësim për të ruajtur qetësinë në situata të ngjashme.
“Kam respekt për çdo mendim apo kritikë, sado e ashpër të jetë ajo. Ky rast më ka treguar se duhet të jem më i durueshëm dhe më i përmbajtur në çdo rrethanë”, ka theksuar ai.
