Deputeti i Lidhjes Demokratike të Kosovës, Armend Zemaj, nuk ka shprehur një qëndrim të qartë lidhur me pjesëmarrjen e tij në votim, në rast se do të mbahej një mocion për të vendosur nëse zgjedhja e kryetarit të Kuvendit duhet të jetë apo jo me votim të fshehtë.
Para fillimit të seancës së 42-të konstituive, Zemaj tha se mbajtja e një mocioni për mënyrën e votimit është çështje që i takon Kuvendit dhe se nuk mund të jep një qëndrim të saktë.
“Nuk e di, këto i takojnë Kuvendit. Këto janë analiza paraprake dhe informacione të cunguara që nuk mund të jap diçka të saktë. Besojmë që LVV-ja duhet ta gjejë mirëkuptimin, konsensusin dhe mirëbesimin që sa më shpejtë ta kryejmë procedurën e zgjedhjes së kryetarit të kuvendit dhe të kalojmë se kush mund ta bëjë qeverinë”, tha Zemaj.
Ndërkaq, lidhur me kërcënimin me bombë paraditen e sotme në Kuvendin e Kosovës, Zemaj tha se nuk ka marrë ndonjë informacion tjetër shtesë.
Sipas tij, kjo ishte një lloj tendence për të minimizuar procesin demokratik dhe të arriturat e Kosovës.
“S’ka asnjë informacion shtesë përveç asaj që e kemi respektuar për tu larguar nga objekti i kuvendit. Duket se është një farë lloj tendence për minimizuar procesin demokratik dhe të arriturat që i ka bërë Republika e Kosovës. Kjo nuk duhet të lejohet për asnjë çmim dhe asnjë interes të askujt…Kërkojmë që kjo të zbardhet”, tha Zemaj.
Seanca konstituive e thirrur të mbahej sot në orën 11:00 u shty për në orën 20:00 për shkak të paralajmërimit për shpërthimin e një bombe brenda ndërtesë së Kuvendit të Kosovës.
Pas kësaj, Policia e Kosovës kërkoi nga deputetët që ta lirojnë ndërtesën.
