Deputeti i zgjedhur i Lidhjes Demokratike të Kosovës (LDK), Armend Zemaj, ka deklaruar se ky subjekt politik nuk i lidh vendimet e tij me emra të përveçëm, por me përmbajtjen e marrëveshjeve politike.
I pyetur nëse LDK-ja do ta votojë Albulena Haxhiun për kryeparlamentare, Zemaj ka theksuar se qëndrimi i partisë është i qartë.
“Asnjëherë nuk i kemi lidhur vendimet tona me emra të përveçëm, por gjithçka që kemi thënë dhe vendosur në pjesën përmbajtësore politike është se pa marrëveshje politike ne nuk votojmë asnjë kandidat”, ka deklaruar ai.
Zemaj ka shtuar se për emrat e përveçëm i takon partisë fituese që të sigurojë votat dhe të krijojë mundësitë për konstituimin e institucioneve të reja.
“Partia fituese duhet t’i sigurojë votat dhe të krijojë mundësitë që t’i kemi institucionet e reja dhe të mos vazhdohet me atë bllokadë që e kishim vitin e kaluar,” ka theksuar ai.
Sa i përket vendimit për votimin në pako të pesë nënkryetarëve të Kuvendit, Zemaj e cilësoi këtë si një strategji të Lëvizjes Vetëvendosje.
“Është strategji, fatkeqësisht, e atij ndërrimi të pozicioneve të LVV-së, e cila në pjesën përmbajtësore të Kuvendit dhe plotësimit të Kushtetutës së Kosovës as nuk do të duhej të ndodhte dhe as të ishte pjesë e debateve politike, pasi e lëndon shtetndërtimin e Republikës së Kosovës”, ështëu shprehur ai.
Ai ka nënvizuar se pakoja për nënkryetarët është pjesë e konsensusit politik të arritur mes partive, duke theksuar rëndësinë e respektimit të marrëveshjeve dhe funksionimit normal të institucioneve.
