Sipas Zemajt, 1 Maji 2022 ka vetëm mosrespektim të theksuar të djersës së punëtorit, mosvlerësim të punës së tyre, kushte më të vështira e padëgjueshmëri totale qeveritare ndaj zërit dhe të drejtave të tyre, shkruan teve1.info
Zemaj ka thënë se kjo Qeveri po u pamundëson garën e drejtë për punësime.
“Kjo Qeveri po u pamundëson edhe garën e drejtë për punësime e lëre më kushtet e punës; në konkursin e KEK-ut aplikuan 4668 persona, ndërsa u pranuan 128 prej tyre, dhe që të gjithë familjarë të zyrtarëve të kësaj ndërmarrjeje dhe militantë e të afërm të pushtetit”, tha ai.
Zemaj theksoi se Qeveria i ka larguar nga puna më shumë se 575 profesionistë shëndetësor.
“Ishte kjo Qeveri që i kishte larguar nga puna më shumë se 575 profesionistë shëndetësor, të cilët ishin në luftë të përhershme me COVID-19. Është kjo Qeveri e cila ende nuk e ka miratuar Ligjin e Pagave, ndërsa rritjen e pagës minimale e ka rritur deri në nivel lëmoshe. Është kjo Qeveri që me veprimin dhe mosveprimin e saj po i inkurajon qytetarët që ta lëshojnë vendin”, ka thënë ndër të tjerash Zemaj.
Tutje ai tha se kjo paaftësia qeverisëse po i thellon krizat.
“Është paaftësia qeverisëse ajo që po i thellon krizat, përkatësisht atë të rritjes së çmimeve të produkteve. Aty ku nuk ka krizë po e krijon një të tillë, ndërsa çmimin padyshim që e paguajnë të gjithë, me theks të veçantë ata që janë në marrëdhënie pune si dhe ata që synojnë të gjejnë një vend pune”, tha Zemaj.
“Në paaftësinë qeverisëse vend qendror zë padëgjueshmëria!”, shtoi ai.
