Sot, më 5 maj në Ditën e Dëshmorëve është zbuluar shtatorja e heroit, Fahri Fazliu, në Obliq.
Në ceremoni kanë marrë pjesë bashkëluftëtarë e figura të larta politike, të cilët nderuan veprën e Fahri Fazliut.
Kryetari i Komunës së Obliqit, Xhafer Gashi, tha se Fahri Fazliu ishte trim e burrë i fortë, si dhe mbetet një frymëzim për të gjithë.
“Zbulimi i shtatores nuk po ndodh rastësisht sot më 5 Maj sepse kontributi i tij ishte i madh. Së bashku me të tjerët ishim rreshtuar krah tij dhe Lëvizjes Popullore, ku si një i ri 19 vjeçar u bashkova në Lëvizjen Popullore, që Fazliu ishte trim e burrë i fortë, dhe mbetet një frymëzim për mua, por edhe për shokët tanë”, tha Gashi.
Iniciatori i shtatores, Arben Krasniqi, tha se qytetarët do ta nderojnë kolosin e tyre.
“Nuk është rastësi që sot më 5 maj, qytetarët e Obiliqit ta nderojnë kolosin dhe heroin tonë, Fahri Fazliu. Përkushtimi i qytetarëve tanë dhe përkushtimi i nivelit lokal, bëri që shtatorja të vendoset sot këtu”, tha ai.
I pranishëm në ceremoni ishte edhe lideri shqiptar nga Maqedonia e Veriut, Ali Ahmeti, i cili tha se me këtë shtatore po pasurohet qyteti i Obiliqit.
“Shkëlqimin Fahri Fazliut ia jep edhe më shumë sepse kjo shtatore që po ngritet nga institucionet që dha jetën e gjakun. Andaj nuk i them faleminderit dikujt që punon në shtëpi të tij por puna e mbarë. Po e pasuroni Obiliqin me këtë shtatore. Në vitin 99 organizata që i takonte Lëvizja Popullore ka pasur koordinimin edhe për demonstratat nga populli në Kosovë”, tha Ahmeti.
Ndërsa, përfaqësuesi i familjes Jashari, Bekim Jashari, kujtoi angazhimin e heroit Fazliu.
“Jam i nderuar që sot gjendem këtu në zbulimin e kësaj shtatore të heroit, Fahri Fazliu. Në këtë shtatore të heroit nderohet jeta dhe vepra e heroit, Fahri Fazliu, i cili që nga protestat e vitit 81 e deri në rënien e tij, nuk u ndalen duke i shërbyer kauzës sonë për liri”, tha ish-kryetari i Skenderajt.
Më 2 nëntor 1989 Fahri Fazliu, u rrethua në lagjen Bregu i Diellit nga policia serbe, ku ra heroikisht dëshmor i kombit.
Kronika e gazetares Lendrina Kodrolli.
