Autori: Adea Mustafaj
Gërmime të reja janë zhvilluar në parkun arkeologjik të Ulpianës.
Vetëm dy ditë më parë u bë një zbulim i ri.
Nën dyshemenë e katedrales, të njohur për mbishkrimin e Justinianit dhe Theodorës, u gjet një mbishkrim i dytë, edhe më i madh.
Ky zbulim sjell dritë të re në historinë e lashtë të Dardanisë.
Detaje rreth gjetjeve të reja dha Ilir Culaj nga Departamenti i Antropologjisë.
“Kemi zbuluar një mbishkrim të dytë i cili është poashtu i rëndësishëm dhe është i rrallë. Janë të ralla këto mbishkrime. Dhe i cili flet për emrin e katredalës, për aspektet dekurative të kadredalës, për ngjarjet e tjera historike. Pra, ky lokalitet, kjo tokë po jep në vazhdimësi informacione shumë të rëndësishme të cilat po e ndriçojnë çdo herë e më shumë historinë e lashtë të Dardanisë”, ka thënë Culaj.
Culaj tutje tha se skanimi i hektarëve se ku do të vazhdojnë gërmimet në vitet e ardhshme tashmë është bërë.
“Ne kemi bo gjeofizike, pra kemi skanu tokën, e dimë orientimisht se ku janë strukturat e qytetit. Ky qyteti këtu i ka 18 hektarë. Ai atje më larg i ka 35 hektarë. Po gjithë hapësira përtejë mureve rrethuese të këtyre qyteteve shkon deri në 120 hektarë. Pra po flasim për një qytet shumë të madh të kohës. Dhe ne i kemi skanu 50 hektarë dhe e dimë se nga do t’i orientojmë gërmimet vitet e ardhshme”, është shprehur tutje Culaj.
Pjesë e gërmimeve është edhe profesori francez, Christophe Goddarsd.
Ai tha për televizionin se zbulimi i mbishkrimit të dytë, për të ishte një surprizë e madhe.
“Surpriza më e madhe që patëm këtë vit ishte gjetja e një mbishkrimi të dytë, i cili i konfirmoi të gjitha elementet që kishim zbuluar më parë. E papritura tjetër janë të gjitha figurat e bukura të kafshëve, madje edhe portreti i një magjistrati lokal që ndodhet në këtë dysheme. Pra, ne gjithashtu e dimë që kjo ndërtesë është e paguar pjesërisht prej njerëzve të këtij qyteti. Kjo është e shkruar në tekst. Kjo na jep shumë informacion dhe gjithashtu,na sjell një përmendje të dytë, një dedikim të dytë nga Justiniani, në këtë vend që, mesa duket, ai e pëlqente shumë”, ka thënë Goddard.
Gërmimet në këto hapësira kanë filluar katër vite më parë dhe priten të zgjasin me vite, pasi deri më tani vetëm 5-6% e lokalitetit është zbuluar.
