Policia e Kosovës ka zhvilluar një aksion policor në Prizren, ku ka kryer kontroll në një shtëpi nën dyshimet për funksionimin e një laboratori për kultivimin e bimëve narkotike të llojit kanabis sativa.
Gjatë operacionit, është arrestuar një i dyshuar në lokacionin fillestar, ndërsa kontrollet kanë vazhduar edhe në tri lokacione të tjera në qytet, ku është arrestuar edhe personi i dytë i dyshuar.
Sipas njoftimit zyrtar, gjatë bastisjeve janë gjetur dhe sekuestruar pajisje të ndryshme që dyshohet se përdoreshin për kultivimin e bimëve narkotike.
Ndër to përfshihen llampa për ndriçim, pajisje për ngrohje, klima, trafo të rrymës, sisteme ventilimi, pajisje për matjen e lagështisë dhe temperaturës, si dhe vegla të ndryshme pune, vazo dhe preparate kimike.
Po ashtu, autoritetet kanë sekuestruar prova materiale, përfshirë një bimë kanabis sativa rreth 30 centimetra, një qese me marihuanë me peshë 1.19 gramë, gjethe të dyshuara të kanabisit me peshë 53.84 gramë, si dhe dy qese plastike me substancë të dyshuar si kokainë me peshë 0.41 gramë.
Në vendin e ngjarjes janë gjetur edhe një armë zjarri (pistoletë) e çmontuar me dy fishekë, 27 fishekë të kalibrit të panjohur, një aparat vakumi, qese plastike, si dhe një veturë dhe një furgon me targa vendore.
Sipas Policisë, të dyshuarit dyshohet se kishin shkatërruar rreth 300 bimë të kanabisit të mbjella brenda laboratorit, me gjatësi rreth 20 deri në 30 centimetra, të cilat dyshohet se janë djegur.
Me vendim të prokurorit, të dyshuarit janë dërguar në mbajtje për 48 orë, ndërsa hetimet lidhur me rastin janë duke vazhduar.
