Zëvendëskryeministri i parë në detyrë për Integrim Evropian, Zhvillim dhe Dialog i Republikës së Kosovës, Besnik Bislimi, ka pritur në një takim pune Përfaqësuesin e Posaçëm të Bashkimit Evropian për dialogun Kosovë–Serbi, Peter Sorensen.
Sipas komunikatës për media të Zyrës së Kryeministrit, në këtë takim është diskutuar mbi hapat e ardhshëm drejt zbatimit të plotë të Marrëveshjes Bazike dhe Aneksit të Zbatimit të Ohrit.
Bislimi ka theksuar nevojën urgjente për trajtimin e çështjes së personave të zhdukur me dhunë, duke theksuar rëndësinë e funksionalizimit të Komisionit të Përbashkët, për të cilin ekziston një marrëveshje e dakorduar që nga dhjetori i vitit të kaluar.
Në takim u ngrit edhe çështja e bllokimit të shpërndarjes së mjeteve për fermerët në Luginën e Preshevës, një proces i penguar nga autoritetet serbe.
Sipas Bislimit, Serbia refuzoi që ta trajtojë këtë problem edhe në takimin e fundit të mbajtur në Bruksel muajin e kaluar, duke thelluar më tej shqetësimet për diskriminim dhe pengesa ekonomike ndaj shqiptarëve të Luginës.
Një tjetër temë e rëndësishme ishte dëmi i vazhdueshëm që, sipas Bislimit, Serbia po ia shkakton Kosovës përmes bllokimit të linjave të interkoneksionit energjetik, çka ka rritur ndjeshëm koston e transmetimit të energjisë jo vetëm për Kosovën, por edhe për rajonin më gjerë.
Në fund, zëvendëskryeministri Bislimi ritheksoi rëndësinë dhe domosdoshmërinë e heqjes sa më të shpejtë të masave të Bashkimit Evropian ndaj Kosovës, duke e konsideruar këtë një hap të domosdoshëm për avancimin e mëtejmë të proceseve integruese dhe të dialogut.
