Një tjetër talent i madh i futbollit evropian është shumë pranë t’i bashkohet Real Madridit. Përfaqësuesit e Dean Huijsen kanë mbërritur tashmë në Madrid për të finalizuar marrëveshjen me “Los Blancos”, duke vulosur një nga transferimet më të bujshme të merkatos së verës.
Sipas burimeve të Fabrizio Romanos, marrëveshja mes klubeve është arritur: Real Madridi do të paguajë klauzolën prej 50 milionë eurosh në tre këste, duke përmbushur kërkesat financiare të klubit të tij aktual.
Huijsen, 19-vjeçari i talentuar që ka tërhequr vëmendjen me paraqitjet e tij të shkëlqyera si mbrojtës qendror, pritet të firmosë një kontratë pesëvjeçare me kampionët e Spanjës. Për momentin, palët po diskutojnë detajet e fundit të kontratës personale të lojtarit, me një marrëveshje që duket e pashmangshme.
