Presidentja e Kosovës, Vjosa Osmani do të shkojë në Tiranë në datat 4 dhe 5 shtator, me ftesë të homologut të saj Bajram Begaj.
Njoftimi u bë i ditur pak ditë më parë, ndërsa ditën e sotme Presidenca dha detaje nga agjenda e vizitës shtetërore, e cila sipas tyre, zhvillohet në një moment të rëndësishëm për dy shtetet dhe për rajonin.
Mësohet se Begaj do ta presë Osmanin me ceremoninë zyrtare të mirëseardhjes në Institucionin e Presidentit të Republikës së Shqipërisë, në orën 10 të datës 4.
Po në datën katër, pas takimit të dy presidentëve do të zhvillohet edhe një takim i zgjeruar mes delegacioneve. Gjatë orës 11:40 – 12:05, dy homologët do të japin një koferencë për shtyp.
Sipas Presidencës, presidentja e Kosovës ka parashikuar edhe takime të tjera të nivelit të lartë.
Njoftimi i Presidencës:
“Presidenti i Republikës, Sh.T.Z. Bajram Begaj do të presë me ftesë të tij në Tiranë, në një vizitë shtetërore në datat 4-5 shtator 2023 Presidenten e Republikës së Kosovës, Sh.S.Znj. Vjosa Osmani.
Më poshtë gjeni disa nga detajet e programit në Institucionin e Presidentit të Republikës, të kësaj vizite, e cila zhvillohet në një moment të rëndësishëm për dy shtetet tona dhe për rajonin.
04 shtator 2023
10:00 – Ceremonia Zyrtare e Mirëseardhjes në Institucionin e Presidentit të Republikës së Shqipërisë.
Vijohet me takimin mes dy Presidentëve dhe më pas takimin e zgjeruar mes delegacioneve.
11:40 – 12:05 Konferencë për shtyp e dy presidentëve.
Përgjatë qëndrimit në Shqipëri, Presidentja Osmani ka parashikuar edhe takime të tjera të nivelit të lartë.”
