Janina Ymeri nga Lidhja Demokratike e Kosovës, ka thënë se vendimi për hyrje në fuqi të tregut të lirë të energjisë elektrike, është bërë për të shfajësuar importin e madh që është bërë gjatë vitit 2025.
Ajo ka thënë se detyrimi i bizneseve për të dal në tregun e lirë të energjisë ka qenë i padrejtë.
“Bizneset janë detyrua me dal nga tregu i rregulluar i energjisë elektrike. Bizneset që tash janë dal në tregun e lirë janë detyrua, kjo s’ka qenë e drejtë. Por kjo ka qenë mundësia e vetme për me shfajësua importin që ka shkua mbi 1milion në ditë në vitin 2025”, ka thënë ajo në emisionin “InfoNata” në Tëvë1.
Ymeri ka vlerësuar se ky nuk është treg i hapur, por “ka pozitë dominues dhe monopol”
Ajo ka thënë se ky vendim mund të ketë pasoja nga largimi i punëtorëve nga puna dhe mbyllja e kompanive.
“Pushtetin e tanishëm, me vjen shumë keq por mundem me konsiderua veç me pushtetin serb. Veç në atë kohë, janë mshel bizneset kryesore”, ka thënë Ymeri.
E për bizneset që nuk kanë nënshkruar kontratë me furnizues, ministrja në detyrë e Ekonomisë, Artane Rizvanolli ka bërë të ditur se ato do të furnizohet nga KEK-u në bazë të çmimit nga bursa shqiptare ALPEX.
Por, Ymeri ka thënë se çmimet në këtë bursë janë më të shtrenjta se në UPEKS.
