Drejtori i institutit “Musine Kokalari”, Visar Ymeri, duke folur për takimin e Ohrit mes kryeministrit të Kosovës, Albin Kurti dhe presidentit serb, Aleksandar Vuçiq, tha se më shumë ka pasur refuzime nga pjesa e Serbisë për planin evropian sesa nga ana e Kosovës.
I ftuar në emisionin “Info Nata”, Ymeri tha se janë duke u luajtur disa” lojëra taktike” nga të dyja palët në dialog.
“Tash unë mendoj që po zhvillohen disa, ta quaj kështu taktika ose lojëra njëkohësisht nga të dyja palët. E para është që mendoj që të dyja prej këtyre liderëve i kanë vërejtjet e veta për sa i përket çështjeve të ndryshme. Pra në njërën anë Vuçiqi i cili insiston që së pari të bëhet Asociacioni, pastaj mund të fillojmë me zbatimin e pjesës tjetër të planit evropian. Ndërkohë që kryeministri Kurti i cili e don njëherë zbatimin e planit evropian, e veçanërisht ato pikat të cilat merren me njohjen, e që duhet Serbia t’i bëjë, dokumenteve, simobeleve shtetërore e kështu me radhë, atë të cilën ai po e quan njohje de facto, e pastaj të merren me Asociacionin e komunave me shumicë serbe “, tha ai.
Tutje Ymeri tha se modaliteti i paralelizmit mes dy palëve do të triumfojë sepse siç tha ai, është edhe më i logjikshmi në situatën kur ka mosbesim mes palëve në dialog.
“Ndërkohë që besoj se deri tash Bashkësia Ndërkombëtare njëfarë mënyre ka tentuar që ta bëjë një lloj sekuencimi të zbatimit të të dyjave, në mënyrë që këto të shkojnë në njëfarë forme paralele. Unë mendoj që ky modaliteti i paralelizmit do të jetë ai i cili do të triumfojë sepse edhe është më i logjikshmi në një situatë kur ka një mosbesim kaq të thellë të palëve, atëherë duhet ta ndërtosh një skemë të sekuencave në mënyrë që të fitohet besimi gjatë procesit”, shtoi ai./teve1.info/
