Nga ora 17:00, ishte planifikuar një ndeshje mes Yllit dhe Besëlidhjes, që do të përcaktonte vendin e tretë në Ligën Unike.
Megjithatë, ky takim nuk do të zhvillohet, pasi skuadra e Yllit, dy orë para duelit, publikoi një “Sqarim” në rrjetet sociale, duke njoftuar për anulimin e ndeshjes.
Në sqarim, skuadra e Yllit shpjegoi se lodhja dhe frika nga lëndimet ishin arsyet kryesore për këtë vendim, dhe theksoi se synimi i tyre është të fokusohet në Superligë, duke përmendur ndeshjen e fundjavës kundër Bashkimit.
Ylli kishte humbur ndaj Vëllaznimit të mërkurën në një ndeshje shumë të luftuar, ku gjakovarët fituan me një kosh dallim dhe siguronin vendin në finale.
Sa i përket “injorimit” të Ligës Unike, Ylli nuk është skuadra e parë që merr një vendim të tillë, pasi edhe në të kaluarën kanë vepruar kështu skuadra të tjera si Prishtina dhe disa skuadra nga Shqipëria.
