Kevin De Bruyne do të largohet nga Manchester City në fund të sezonit, me Real Madridin që thuhet se është në radarin e tij.
Mesfushori belg, një figurë kyçe për Cityn në vitet e fundit, do të bëhet lojtar i lirë dhe mund t’i bashkohet gjigantëve spanjollë.
Largimi i mundshëm i Luka Modric nga Real Madridi ka hapur një vend të lirë në mesfushën e tyre, dhe De Bruyne shihet si një zëvendësim i mundshëm.
Sipas mediumit DefensaCentral, kampi i belgut ia ka ofruar atë klubit, me shpresën se përvoja dhe cilësia e tij mund ta forcojnë menjëherë ekipin.
De Bruyne është i gatshëm ta ulë ndjeshëm pagën e tij për ta bërë të mundur transferimin.
Aktualisht, duke fituar rreth 16 milionë euro në sezon te City, ai thuhet se është i hapur për ta përgjysmuar pagën e tij për t’u bashkuar me Los Blancos dhe për të ndërmarrë një sfidë të re.
Pavarësisht respektit për aftësitë e De Bruyne, Real Madridi është i përqendruar në ndërtimin e një skuadre më të re.
Vendimi përfundimtar i klubit mund të varet nga kush do ta drejtojë ekipin sezonin e ardhshëm, me Xabi Alonson si një kandidat potencial për këtë post.
Ndërsa De Bruyne nuk është një prioritet i menjëhershëm, emri i tij do të mbetet në radarin e Real Madridit ndërsa afron afati kalimtar i verës.
