Xuxi ka folur në një intervistë të fundit për eksperiencën e tij në Big Brother VIP Kosova, duke treguar hapur edhe arsyen që e shtyu të bëhej pjesë e formatit të njohur.
Xuxi tha troç se arsyeja nuk kishte të bënte me famën, por me nevojën financiare.
“Kur kam hyrë, kam thënë që unë kam hy këtu jo për t’u bërë i famshëm, po për të fituar çmimin, për shkak të nevojës financiare. Dhe 200 mijë euro për tre muaj, problem është t’i fitosh”, tha artisti.
Pavarësisht se ai kishte famë edhe para hyrjes në reality show-n e ndjekur gjerësisht, Xuxi pranoi se Big Brother VIP ia ndryshoi mënyrën se si e perceptonin njerëzit, sidomos të rinjtë.
“Ajo çfarë ka bërë ky format, që një orë më vjen mirë, një orë më vjen keq, është që fëmija 5-6 vjeç e deri në moshën 25-28-vjeçare më njohin dhe më përshëndesin. Ky target është shumë i madh tek ne, sepse jemi një popull me moshë mesatare shumë të re”, u shpreh ai.
