Kombëtarja e Zvicrës përgatitet për një nga sfidat më të vështira në kualifikueset e Botërorit, teksa udhëton drejt Stokholmit për t’u përballur me Suedinë.
Edhe pse skuadra skandinave nuk ka pasur një nisje të shkëlqyer në këtë fushatë, kapiteni i Zvicrës, Granit Xhaka, i ka paralajmëruar lojtarët e Zvicrës të jenë maksimalisht të përqendruar, duke paralajmëruar për fuqinë ofensive të kundërshtarit.
“Suedisë nuk i ka ecur mirë në fillim, ndoshta ashtu siç kanë pritur vetë dhe të tjerët. Por kur sheh me kujdes ekipin e tyre, e kupton që cilësia është aty,” – u shpreh Xhaka për Blick.ch.
“Na pret një sfidë shumë e vështirë në udhëtim dhe një super-sfidë për ne si ekip.”
Suedia mbështetet te një treshe sulmuese me vlerë mbi 273 milionë euro – Viktor Gyökeres, Anthony Elanga dhe Alexander Isak – të gjithë emra të njohur të Premier Leagues dhe futbollit evropian. Edhe pse ky repart nuk ka qenë në nivelin e pritshëm në ndeshjet e para të kualifikueseve, Xhaka këmbëngul që nuk duhet nënvlerësuar forca e tyre.
Trajneri i Zvicrës, Murat Yakin, ka një qasje të kujdesshme ndaj këtij reparti:
“Sulmues të tillë duhet t’i mbash gjithmonë në vëzhgim. Janë lojtarë që ndoshta nuk i sheh shumë gjatë lojës, por në një moment të vetëm mund të bëjnë diferencën,” – tha Yakin për mediat zvicerane.
Emri që spikat më shumë është ai i Viktor Gyökeres, sulmuesi që ka shkëlqyer me Sporting Lisbonën, ku ka shënuar 125 gola dhe asistime në 102 paraqitje, para se të transferohej te Arsenali. Xhaka, ish-kapiten i Arsenalit, e njeh mirë profilin e sulmuesit dhe thekson:
“E dimë që duhet të luajmë me zgjuarsi të madhe. Ai është një lojtar që nuk fal.”
Megjithatë, Yakin nuk duket i shqetësuar më tepër seç duhet. Ai kujton se skuadra e tij ka përballuar edhe më parë sulmues të ngjashëm si Muriqi (Kosovë) dhe Sesko (Slloveni) gjatë ndeshjeve të shtatorit.
“Në fund të fundit, duhet të shohim të gjithë pamjen e ndeshjes dhe të gjejmë ekuilibrin mes mbrojtjes dhe sulmit,” – përfundoi trajneri i Zvicrës.
