Pasi u nderua duke u nominuar për çmimin prestigjioz “Topi i Artë”, kapiteni i Zvicrës, 32-vjeçari Granit Xhaka, ka lënë pas yje botërore të futbollit në ranglistën e mediumit britanik, “The Guardian”, për 100 lojtarët më të mirë të vitit 2024.
Në këtë listë janë edhe lojtarë si Lionel Messi që është në vendin e 27-të, Virgil Van Dijk në vendin e 30-të, Kevin De Bruyne në pozitën e 36-të dhe Cristiano Ronaldo në vendin e 42-të.
Mesfushori i Bayer Leverkusenit është në vendin e 26-të sipas mediumit të madh britanik, një pozitë para superyllit argjentinas që aktivizohet tek Inter Miami.
“Pak do të mund të besonin se lëvizja te Leverkuseni do të ishte i suksesshëm, por pa e ekzagjëruar, ai është vendimtar për ekipin e drejtuar nga Xabi Alonso”, ka shkruar “The Guardian” për Granit Xhakën.
Xhaka është “lideri” i kampionit gjerman.
“Ai luan mirë në mbrojtje, vendos shpejtësinë e lojës dhe shënon gola të pabesueshëm. Ai është në formën më të mirë dhe mbetet lojtar i rëndësishëm për Përfaqësuesen e Zvicrës”.
Listën me 100 lojtarët më të mirë brenda një viti, “The Guardian” ka nisur ta publikojë që prej vitit 2012.
Dhe për herën e parë, Messi nuk është në mesin e dhjetë lojtarëve më të mirë.
Kësaj liste të publikuar të premten i prinë fituesi i “Topit të Artë”, 28-vjeçari i Manchester Cityt, Rodri, para yllit të Real Madridit, 24-vjeçarit Vinicius Junior.
Viniciusi e fitoi çmimin “The Best” nga FIFA, si lojtari më i mirë i vitit në botë.
Erling Haaland i Manchester Cityt, Lamine Yamal i Barcelonës dhe Jude Bellingham i Real Madridit, e plotësojnë pesëshen më të mirë.
Harry Kane, Lautaro Martinez, Florian Wirtz, Dani Carvajal dhe Kylian Mbappe janë në mesin e dhjetë më të mirëve po ashtu.
