Faqja zyrtare e UEFA-s, të premten ka publikuar një intervistë të kapitenit të Zvicrës, Granit Xhaka, në prah të Kampionatit Evropian.
Zvicra ndeshjen e parë në “Euro 2024” e luan të shtunën prej orës 15:00, ku përballet me Hungarinë në kuadër të Grupit A, i cili përbëhet edhe nga Gjermania e Skocia.
Si kapiten, Xhaka nuk ka hezituar t’i zbuloj ambiciet e Zvicrës dhe ka insistuar se në Gjermani dëshiron të shkruaj historinë. “Unë jam shumë ambicioz, dua të jem i suksesshëm.
Dua të udhëheq ekipin që të shkruaj histori në Gjermani”, është shprehur Xhaka.
Sa i përket ndeshjes së parë me Hungarinë, Xhaka ka insistuar se synimi është fitorja, ndërsa ka besim të madh se Zvicra do të arrij të kaloj grupin.
“Është e qartë se duam ta kalojmë grupin. Është grup i vështirë, por synimi ynë i parë është të kalojmë në fazën nokaut. Ndeshja e parë me Hungarinë është e rëndësishme dhe do të ishte shumë mirë nëse fillojmë me fitore”, është shprehur Xhaka.
Krahas Xhakës, pjesë e Zvicrës janë edhe Xherdan Shaqiri e Ardon Jashari.
