Mesfushori Granit Xhaka ka kthyer fokusin kah Kupa e Gjermanisë pas humbjes në finalen e Ligës së Evropës.
Bayer Leverkuseni u mposht 3:0 nga Atalanta për t’i dhënë fund serisë prej 51 ndeshjeve pa humbje në të gjitha garat.
Xhaka ka pranuar se i vjen keq që nuk e ka fituar Ligën e Evropës por ka shtuar se tani synimi është te Kupa e Gjermanisë pasi dëshiron trofeun e dytë me Leverkusenin pas titullit të kampionit në Bundesligë.
“Është mëkat që e humbëm këtë finale, por jeta vazhdon. Duhet ta kalojmë sa më shpejt këtë dëshpërim dhe të fokusohemi te Kupa e Gjermanisë, trofe ky që duam ta fitojmë pas titullit të kampionit”, ka thënë Xhaka.
Leverkuseni, të shtunën mbrëma luan kundër Kaisterslauternit në finalen e Kupës së Gjermanisë që zhvillohet në Berlin.
