Granit Xhaka është i bindur se Bayer Leverkuseni do ta fitoj edhe trofeun e Ligës së Evropës.
Mesfushori shqiptar beson në fitoren e Leverkusenit ndaj Atalantas në finalen e Dublinit që luhet të mërkurën mbrëma prej orës 21:00.
Pas titullit të kampionit në Bundesligë, Leverkuseni po synon edhe Ligën e Evropës, përpara se të fokusohet te Kupa e Gjermanisë për ta mbyllur edicionin me tre trofe të fituar. Duelin ndaj Atalantas, Xhaka nuk e sheh aspak të lehtë por insiston se Leverkuseni mund t’ia dalë mbanë në këtë finale.
“Finalet janë për t’u fituar. Ekipet italiane janë gjithmonë të forta në mbrojtje, ndërsa Atalanta është e specializuar në këtë repart. Fizikisht janë të fortë dhe të shpejt, por edhe në si ekip kemi disa cilësi dhe besoj se do t’ia dalim mbanë”, ka thënë Xhaka në një intervistë për faqen zyrtare të UEFA-s.
Po ashtu, Xhaka ka thënë se mentaliteti dhe cilësia brenda ekipit, e kanë bërë Leverkusenin këtë edicion të pamposhtur, ndërsa ka pasur fjalë të mëdha edhe për trajnerin Xabi Alonso.
