Në një intervistë si asnjëherë më parë, Granit Xhaka ka folur për familjen e tij, të ardhmen te Bayer Leverkuseni, por edhe kritikat që i merr nga babai i tij.
Xhaka pati një sezon të hatashëm vitin e kaluar duke iu bërë kampion i Gjermanisë me Bayer Leverkusenin dhe fitues i Kupës, por në këtë edicion, megjithëse ka ende ndeshje, duket se ekipi gjerman, nuk do të arrijë ta mbrojë titullin e kampionit të Bundesligës.
Xhaka në një intervistë për revistë gjermane “Kicker”, ka zgjedhur ta paraqesë edhe anën personale të tij dhe të familjes. Javë më parë, ai dhe bashkëshortja e tij, u bënë prindër të një vajze, për herë të tretë.
“Ato më kanë ndryshuar. Unë jam ende po ai Granit që erdhi në Bundesligë në moshën 19-vjeçare. Ende jam po aq emocional sa në kohën kur luaja te Gladbach. Por tani jam më me përvojë dhe nuk i shfaq më këto emocione në fushë, por i përpunoj në shtëpi. Kur përqafoj fëmijët e mi atje, loja humbet rëndësinë për një moment. Në mbrëmje, kur ata flenë, atëherë fillon “shfaqja” ime.
Xhaka që shpesh në fushë është impulsiv dhe së fundit u bë viral një video pamje e tij duke debatuar ashpër me një tifoz të klubit, pas humbjes në Kupën e Gjermanisë nga Bielefeldi, ka thënë se nga kritikët më kë të mëdhenj, është babai tij, Ragipi.
“Kur është edhe babai im në shtëpi, një ndeshje bëhet edhe më intensive. Duhet ta ndalim vazhdimisht ndeshjen. Ai më jep gjithmonë këshilla të reja. Ka qenë gjithmonë motivuesi im kryesor. Babai im nuk më ka lavdëruar kurrë.
Në këto 32 vjet, nuk kam marrë asnjëherë ndonjë lavdërim prej tij si futbollist. Po ju them: ajo është motivimi im – që një ditë të vijë momenti kur ai të më thotë: “Sot ke luajtur jashtëzakonisht mirë.”
“Që nga dita e parë e karrierës sime, çdo ndeshje e kam analizuar me babain tim. Nëse nuk ishte në stadium, flisnim në telefon ose e shikonim ndeshjen bashkë përsëri. Gjithmonë me respekt dhe pa emocione të tepruara. Ai e njeh mirë futbollin dhe e di çfarë flet. Kjo më ka ndihmuar shumë mua dhe karrierës sime. Prandaj kam këtë uri, këtë dëshirë të madhe, që deri në fund të karrierës sime, ai të më thotë një herë që kam luajtur mirë. Dhe ajo që është e rëndësishme për mua: babai im nuk është i ashpër apo pa zemër. Ai më motivon. Më ka mësuar të jem i fortë, të mos dorëzohem kurrë, të mos ik”.
Së fundit emri i tij përmendet shpesh për një largim nga Gjermania, në drejtim të Turqisë, te skuadra e madhe Galatasaray, por që vet futbollisti mohon gjithçka.
“Nuk jam duke e menduar largimin. Nuk kam zgjedhur pa arsye një kontratë afatgjatë me Bayer 04”, përfundon intervistën Xhaka.
