Kryeministri i Maqedonisë së Veriut, Talat Xhaferi, deklaroi se imazhi i Kosovës në sytë e ndërkombëtarëve nuk është në të njëjtat nivele që ka qenë.
Xhaferi thotë se Kosova duhet të merret seriozisht me këtë çështje, dhe se raportet me ndërkombëtarët duhet të përmirësohen.
“Fatkeqësisht imazhi institucional i subjektivitetit ndërkombëtar të Kosovës sot nuk është në nivelet që kanë qenë para shumë kohësh. Sot, ka shkuar në kontekstin negativ. Pra ne nuk na vjen mirë dhe nuk kënaqemi me këtë situatë. Ne na prekë, jemi të shqetësuar për faktin se vetë shqiptarët e Maqedonisë kanë dhënë kontribut që shteti i Kosovës të jetë shteti i Kosovës, të ngrihet në nivelin që duhet dhe nuk është aspekti im individual, por është ndjesia e shumë shqiptarëve në Maqedoni. Për faktin se kanë shumë kontribut shqiptarët nga Maqedonia dhe ne bashkëndjejmë aspektin e humbjes së imazhit që ka pasur paraprakisht Republika e Kosovës”.
“Duhet me u marrë drejtpërdrejt më shumë dhe për të rregulluar raportet. Ne nuk themi të pranohet me çdo kusht, por duhet të koncentrohen në përgjegjësi që na takojnë me vendet tona dhe jo me u marrë me fqinjët dhe statusin e fqinjësisë”, tha Xhaferi për Abcnews.al.
Ndërkombëtarët kanë mbajtur qëndrime kritike ndaj Kosovës dhe kryeministrit Albin Kurti lidhur me ngjarjet e fundit që kanë përfshirë vendin, ndalur edhe tek vendimi për të ndaluar dinarin serb.
Xhaferi foli për mungesën e kryeministrit të Kosovës, Albin Kurti në Samitin që u mbajt në Tiranë.
Ai tha se që prej shpallës së pavarësisë, Kosova ka fituar të drejtën e karriges të jetë prezentë dhe të prezantojë interesat e popullit të popullit të Kosovës.
Më tej ai tha se kryeministri i Kosovës duhet të sqarojë para organeve të veta shtetërore dhe popullit të vet për mungesën e tij në Samitin në Tiranë
