Analisti politik, Visar Xani vlerëson se partitë opozitare në vend kanë nevojë për reforma të brendshme rrënjësore, pasi sipas tij, nuk po arrijnë të nxjerrin një “zë të vetëm brenda partive të tyre”.
Xani thotë se me veprimet që po bën Qeveria, opozita ka material të mjaftueshëm për ta goditur e për të fituar poenë politikë.
“Këto parti opozitare kanë nevojë fillimisht të bëjnë reforma rrënjësore, të analizojnë procese, për shkak që unë po besoj kanë figura të mjaftueshme brenda tyre, dhe deri më sot nuk kemi pas një analizë të një procesi, me dal një parti opozitare me propozime dhe me zgjidhje dhe me elemente të caktuara. Veprimet që është duke i bërë sot Qeveria e Kosovës, për opozitën do duhej të ishte dasmë në një farë mënyre, në kuptimin e asaj që kanë material të bollshëm për ta goditur Qeverinë, për të fituar poenë politikë, ndërsa nëse vazhdojnë me këtë heshtje, Qeveria vetëm mund të ngrit përqindjen e tyre, nëse do të kemi zgjedhje të shpejta, ndërsa partitë opozitare veç do të kenë rënie edhe më poshtë”, deklaroi ai në “Ditari” në Tëvë 1.
Sipas tij, “sa kemi nevojë për qeveri të fortë, kemi nevojë edhe për një opozitë të fortë”. /Teve1.info/
