Politologu, Visar Xani ka thënë se liderët nga gjithë bota janë duke e uruar Donald Trump për fitore – pasi po i frikësohen fuqisë së tij.
Ai tha se fuqia e Trump në këtë mandatë është pothuajse e pandalshme.
“Sot e kemi pra një triumfues, që realisht po e shohim nga Evropa, Kosova dhe gjithë bota duke e uruar, jo që janë gëzuar për Trumpin, por sepse po i frikësohen fuqisë së tij… Kush do të mund ta ndalë për politikën e jashtme dhe atë të brendshme të ShBA-ve. Gjithë sistemin e ka në dorë dhe fuqia e tij do të jetë pothuajse e pandalshme dhe i mbetet të tjerëve të bashkëpunojnë, si dhe shpresoj që idetë e tij t’i pëlqejnë atij që bashkëpunon me të”, ka thënë Xani në emisionin “Këndi i Debatit” në Tëvë1.
Xani tha prioritet për të mund të jetë situata në Lindje të Mesme dhe lufta Ukrainë –Rusi, por pa e lënë në hije Ballkanin.
“Ballkani ka sfida të mëdha…se sa do të jemi prioritet i administratës Trump mbetet me pa. Duhet me u rikujtuar se në fund të mandatit të tij ishte Kosova prioritet, por nuk bëhet fjalë për fillime të mandatit të tij dmth të mandati i parë. E tash si do të fillojë vështirë me parashiku se ka shumë kriza, në Lindjen e Mesme e që besoj që janë prioritet pasi që ka çdo ditë viktima, pastaj lufta Ukrainë-Rusi. Të gjitha këto i lënë në hije çështjet e Ballkanit, por në asnjë mënyrë për t’i neglizhuar pasi mund të eskalojnë në çdo moment”, ka thënë ai.
