Dëshmitari Paul Williams, i cili në mënyrë vullnetare dhe pa pagesë e kishte mbështetur delegacionin kosovar në Rambuje, ka treguar para Gjykatës Speciale se Jakup Krasniqi kishte pasur një qasje pozitive në raport me të drejtat e pakicave në Kosovë, përfshirë edhe komunitetin serb dhe atë rom.
Williams ka kujtuar se gjatë konferencës së Rambujesë, delegacioni i Kosovës ishte i ndarë në disa grupe pune, ndërsa ai vetë kishte pasur detyrë të koordinonte aktivitetet mes tyre.
Sipas tij, në një nga grupet punuese bënin pjesë Blerim Shala, Jakup Krasniqi dhe Fehmi Agani, ky i fundit përfaqësues i Lidhjes Demokratike të Kosovës.
Në dëshminë e tij, Williams theksoi se mbështetja e tij për delegacionin kosovar nuk ishte e kufizuar vetëm në Rambuje, por kishte vazhduar edhe gjatë procesit të Vjenës dhe hartimit të Kushtetutës së Kosovës, ku sërish kishte pasur kontakt me Krasniqin.
I pyetur nëse këto takime kishin ndodhur konkretisht në periudhën 2006–2007, dëshmitari u përgjigj: “Me sa më kujtohet, po.”
Sipas tij, ashtu si në Rambuje, edhe në këto procese të mëvonshme Krasniqi kishte treguar një qasje bashkëpunuese dhe konstruktive.
