Lëvizja Vetëvendosje ka zyrtarizuar marrëveshjen e koalicionit me Listën Guxo, Alternativën dhe PDSHK-në për zgjedhjet e parakohshme të 28 dhjetorit.
Sipas VV-së, ky bashkim përfaqëson një zotim të përbashkët politik për fazën e ardhshme qeverisëse.
Në komunikatë, VV thekson se koalicioni ka si qëllim forcimin e institucioneve dhe thellimin e demokracisë, duke siguruar një qeverisje të ndershme, transparente dhe të përgjegjshme ndaj qytetarëve.
“Marrëveshja e koalicionit paraqet një zotim të përbashkët për forcimin e institucioneve, thellimin e demokracisë dhe garantimin e një qeverisjeje që u shërben qytetarëve me transparencë dhe integritet. Ky bashkim përcakton prioritetet dhe vizionin që do ta udhëheqin vendin në fazën e ardhshme të qeverisjes”, thuhet në njoftim.
Vetëvendosja vlerëson se Guxo, Alternativa dhe PDSHK kanë kontribuar ndër vite në mbrojtjen e interesit publik, avancimin e barazisë qytetare dhe ruajtjen e karakterit republikan të shtetit.
“Secila prej këtyre subjekteve sjell vlera të qëndrueshme politike, përvojë të akumuluar dhe përgjegjësi të dëshmuar në angazhimin publik”, përfundon komunikata.
