Shefja e Grupit Parlamentar të Vetëvendosjes, Mimoza Kusari-Lila, ka kërkuar në emër të Grupit që të rishikohet edhe njëherë deklarata e propozuar nga AAK-ja për e cila e mbështet Rezolutën e Parlamentit Evropian mbi zhvillimet e Dialogut Kosovë-Serbi dhe situatën në katër komunat veriore, raporton teve1.info
Kërkesën e bëri Mimoza Kusari-Lila në emër të VV-së, pasi propozimi për votimin e kësaj deklarate u bë nga shefi i Grupit Parlamentar të Aleancës për Ardhmërinë e Kosovës, Besnik Tahiri.
“Ne si VV jemi në mbështetje në parim vetëm kërkojmë mirëkuptimin edhe të opozitës që të bëhet edhe njëherë një rishikim i përbashkët dhe sot gjatë ditës t’i kthehemi dhe ta miratojmë, nuk ka çështje parimore vetëm duhet të jemi në të njëjtën vijë”, tha Kusari-Lila.
Ndërkohë, shefi i rupit Parlamentar të AAK-së, Besnik Tahiri, tha se kjo Rezolutë në 20 pika e dënon sulmin e 24 shtatorit në veri të Kosovës dhe në shumë pika e sqaron rolin destabilizues të Serbisë.
“Kjo rezolutë e dënon në 20 pika sulmin e 24 shtatorit dhe në shumë pika e sqaron rolin destabilizues të Serbisë, lidhjet e saj të ngushta me Rusinë etj.”, tha Tahiri.
Parlamenti Evropian më 19 tetor e miratoi një Rezolutë mbi zhvillimet e fundit në Dialogun Kosovë-Serbi, përfshirë situatën në komunat veriore të Kosovës.
