Derbin e xhiros së 15-të në kategorinë e dytë të futbollit kosovar ndërmjet Vushtrrisë dhe Trepçës, e kanë fituar vushtrriasit.
Vushtrria dominoi nga fillimi i ballafaqimit ndaj Trepçës dhe në fund i fitoi pikët e plota pas triumfit 4:1.
Ndeshja u zhvillua në stadiumin “Ferki Aliu”, në praninë e një numri të madh shikuesish.
Me fitore, Vushtrria mbetet lidere me 34 pikë, ndërsa Trepça mbetet me 23 pikë.
Kjeldi Paloka shënoi për 1:0 në minutën e tretë. Ai u asistua nga Daut Maxhuni.
Sylas Gabriel i Trepçës e la Trepçën me një futbollist më pak në fushë pas ndërhyrjes së ashpër në Leutrim Islamin e Vushtrrisë. Kartoni i kuq iu dha Gabrielit pas rishikimit të situatës në VAR.
Epërsinë numerike të lojtarëve në fushë, vendësit e shfrytëzuan menjëherë.
Për 2:0 shënoi Ebrima Jatta në minutën e 36-të.
Vushtrria nuk u ndal dhe shpejtë e shënoi edhe golin për 3:0. Në minutën e 42-të shënoi Bujar Shabani.
Trepça shënoi vetëm golin ngushëllues përmes qendërmbrojtësit Rashid Alhassan.
Derisa golin për 4:1 dhe të rezultatit përfundimtar e shënoi Albijon Shurdhiqi.
