Ish-drejtori i Agjencisë për Siguri dhe Informacion të Serbisë (BIA), Aleksandar Vulin, ka njoftuar se për arrestimin e politikanit serb, Nikola Sanduloviq, ishte ai që kishte lëshuar urdhër-arrest në kohën sa e drejtonte këtë institucion.
Vulin ka shkruar se Sanduloviq u arrestua me dyshimin për cenim të rendit kushtetues, teksa ka shtuar se ka lënë urdhër-arreste tjera aktive edhe për “tradhtarë” tjerë.
Më tej, Vulin i ka shprehur falje Serbisë që s’ka mundur të bëjë më shumë, mirëpo duke mos specifikuar për çka e ka fjalën.
“Sandulovia u ndalua me urdhrin tim, i cili mbeti në fuqi edhe pas dorëheqjes sime. Ai u arrestua me dyshimin për cenim të rendit kushtetues dhe duke punuar aktivisht për të mbështetur shkëputjen e të ashtuquajturës Kosovë”, Nëse Sanduloviqi do të kishte vendosur një kurorë në varrin e Himmlerit, Mossadi do ta kishte vrarë, nëse ai do të kishte vendosur një kurorë në varrin e Osama bin Ladenit, CIA do ta kishte vrarë atë, duke vendosur një kurorë në varrin e vrasësit të serbëve Adem Jashari, Sanduloviqi mori vetëm arrest me urdhrin tim dhe paraburgim me urdhrin e prokurorit. I kërkoj falje Serbisë që nuk munda të bëja asgjë më shumë. Nuk e di se për cilët tradhtarë të tjerë janë aktiv urdhrat e mi të arrestit dhe për çuarjen e tyre para prokurorëve kompetentë, por është mirë që tradhtarët të kontrollojnë vetë, shpresoj që urdhrat të mos jenë anuluar”, tha ish-drejtori i Agjencisë së Informacionit të Sigurisë në Serbi, Aleksandar Vulin, për “Novosti”.
Kujtojmë se Sanduloviq u rrah brutalisht në ndërtesën e BIA-s serbe nga data 3 deri më 4 janar, 2024.
Avokati serb, Çedomir Stojanoviq, tha se Sanduloviqi është rrahur për shkak se postoi një video në platformën X ku shihej duke vënë lule te varrezat e familjes Jashari në Prekaz dhe për faktin se kishte kërkuar falje për krimet serbe në Kosovë.
