I rrethuar nga propaganduesit më besnikë të Putinit, Vulin lëshohet në teori konspirative për Bashkimin Evropian.
I sanksionuar nga ShBA, zëvendëskryeministri i Serbisë, Aleksandar Vulin, ka zgjedhur që nga Moska të hedhë kritika të ashpra kundrejt Bashkimit Evropian.
Ai nuk ka kursyer teoritë konspirative, duke pretenduar se BE provokon konflikte dhe po shkakton destabilitet. Dhe për krejt këto deklarime të tij, Qeveria e Serbisë ka lëshuar edhe një komunikatë zyrtare.
“Prandaj, BE-ja po përpiqet, nëpërmjet përfaqësuesve të saj, të shkaktojë destabilitet dhe konflikt në BeH, duke tentuar të rrëzojë Milorad Dodik dhe Republikën Srpska, dhe në këtë mënyrë të përmbysë në mënyrë indirekte (presidentin serb) Aleksandar Vuçiq, sado që përfaqësuesit e BE-së betohen se kjo nuk është e vërtetë”, tha Vulin.
Akuzat e Vulin për “përpjekjen për të përmbysur” liderët e Republikës Srpska dhe të Serbisë i referohen vendimit të Gjykatës së Bosnjës dhe Hercegovinës kundër Milorad Dodik për mosrespektim të vendimeve të Përfaqësuesit të Lartë në Bosnjë dhe Hercegovinë, si dhe protestat që janë bërë për shkak të një aksidenti në të gjithë Serbinë për më shumë se “tre muaj grusht shteti”.
Në një ligjëratë në një Universitet rus, të titulluar “Situata aktuale politike dhe e sigurisë në botë, vendi i Serbisë në të, përpjekjet për të rigjallëruar nazizmin dhe rishkruar historinë”, Vulin përsëriti se Beogradi “nuk do të vendosë kurrë sanksione ndaj Moskës” dhe se “Serbia mbetet një aleate e besueshme dhe e sinqertë e Rusisë”.
Sipas deklaratës, Vulin zhvilloi një takim me rektorin e Universitetit Rus për Shkenca Humane Alexei Loginov dhe ideologun politik dhe filozofin rus Alexander Dugin para leksionit.
Dugin, një ideolog i ekstremit të djathtë me lidhje me Moskën zyrtare, është një mbështetës dhe propagandues i zëshëm i pushtimit rus të Ukrainës.
Për shkak të lidhjeve të ngushta me Moskën, Vulin është nën sanksionet e Shteteve të Bashkuara të Amerikës.
