Viti 2026 do të jetë një pikë kthese në rritjen e fuqisë ushtarake në rajon.
Kosova, Shqipëria dhe Kroacia, për herë të parë këtë vit, do të realizojnë ushtrimin e përbashkët ushtarak, pas marrëveshjes së nënshkruar më 18 mars 2025 në Tiranë.
Brenda marrëveshjes trelaterale, ekziston pika dy, Rritja e ndërveprueshmërisë përmes edukimit, trajnimit dhe ushtrimeve.
Ky ushtrim, po vlerësohet tejet pozitiv në një kohë të brishtë të sigurisë në rajon.
“Nga perspektiva në Kosovë duhet të shikohet jashtëzakonisht pozitivisht për vet faktin që ka një marrje të përgjegjësive të vendeve që kanë interesa strategjike, evropiane për paqe dhe siguri në Evropë, që të bashkëveprojnë dhe të jenë të përgatitura për çfarëdo kërcënimi që mund të ballafaqohet rajoni. Ka qenë një kërkesë e kahmotshme të SHBA-së që vendet evropiane të marrin përgjegjësi, mendoj që këtë duhet ta shohim nga kjo perspektivë, sidomos vendet që janë më të vogla, Shqipëria, Kroacia dhe Kosova ku numri i banorëve është modest”, thotë drejtori i QKSS-së, Mentor Vrajolli.
Me këto veprime, sipas analistit Ben Andoni, Kosovës po i hapet rrugë përmes kartës së Adriatikut, për t’u bërë pjesë e aleancës më të madhe ushtarake, NATO.
“Më shumë se sa stërvitje, ajo për herë të parë është jetësimi i marrëveshjes i cili deri tani në këto momente, ka qenë politik dhe nga ana Serbisë, është marrë si kërcënim jashtëzakonisht i madh, për Beogradin zyrtar. Në fakt, z Vengu jo thjesht në emër të Shqipërisë, por në emër të këtij pakti, ka ftuar edhe Serbinë që të jetë pjesë e këtij pakti, kuptohet që Serbia nuk i është përgjigjur. Më shumë i ka pëlqyer kjo marrëveshje që të mbanë narrativën se kinse vazhdimisht është kërcënuar”, deklaroi Andoni.
I shqetësuar me këtë aleancë po shfaqet presidenti serb, Aleksandar Vuçiq.
Një ditë më parë, ai tha se ende po pret përgjigje në pyetjen se pse po krijohet një aleancë ushtarake mes Prishtinës, Tiranës dhe Zagrebit.
Derisa paralajmëroi se kjo është arsyeja pse Serbia do të investojë më shumë në mbrojtje.
“Me formimin e një aleance ushtarake të Kroacisë me Prishtinën dhe Tiranën, ne jemi seriozisht të rrezikuar dhe do të merremi me këtë çështje me shumë seriozitet. Së shpejti do të marr pjesë në kolegjiumin e Shtabit të Përgjithshëm dhe të Ministrisë së Mbrojtjes dhe do të vizitoj të gjitha fabrikat e industrisë ushtarake. Do të investojmë një shumë të madhe shtesë të parave në fabrikat e industrisë ushtarake”, deklaroi presidenti serb.
Sipas Vrajollit, Serbia po tenton që në një të ardhme të afërt të bëhet vend dominues në aspektin ushtarak.
“Është një marrëveshje e cila dihet qartazi që është në pajtim të plotë me objektivat strategjike që ka NATO-ja, që është garantimi i paqes dhe sigurisë në rajon, ajo se si trajtohet nga Serbia, mendoj që është çështje që tregon shumëçka për vet faktin që Serbia reagon për një marrëveshje që ekziston mes tri vendeve që kanë objektiv pro NATO-s apo perëndimore”.
Përveç ushtrimit të përbashkët, së fundi Ministrja e Mbrojtjes ka arritur marrëveshje me atë të Shqipërisë, për të nisur prodhimin e autoblindave ushtarake, “SHOTA” edhe në Kosovë.
