Dy ditë pas thirrjes së presidentit serb, Aleksandar Vuçiq që serbët e veriut të marrin iniciativa për zgjedhje të reja në komunat veriore të Kosovës, ai udhëtoi për në Kinë. Atje zhvilloi takim dypalësh me homologun e tij kinez, derisa takoi edhe presidentin rus, Vladimir Putin. Lëvizjet e tij pas rastit të 24 shtatorit në Banjskë, po shihen si mënyra indirekte të Vuçiq për të arritur shfajësimin, por edhe mundësinë e përsëritjes së skenarit në pjesën veriore të vendit.
Të martën në një forum të organizuar në Kinë, Presidenti i Serbisë, Aleksandar Vuçiq, kishte një takim edhe me presidentin e Rusisë, Vladimir Putin.
Ky takim ndodhi në kohën, kur BE është duke pritur rezultatet përfundimtare të ngjarjeve në Banjskë, e që mund të sjellin edhe masa ndëshkuese, nëse vërtetohet se shteti serb ka pasur gisht në sulmin terrorist në veri.
Sipas njohësit të çështjeve të sigurisë, Fatmir Çollaku, Kina dhe Rusia përherë kanë qenë krah i fortë i Serbisë.
Andaj kjo e fundit, nëse nuk gjen zgjidhje përmes Evropës dhe Amerikës, e shfrytëzon këtë aleancë.
“Në çdo situatë kur nuk mund te arrihet objektivat dhe qëllimet e tyre përmes dialogut, apo formave të tjera me bashkësinë ndërkombëtare, në këtë rast me Evropën dhe Amerikën, alternativën e dytë Serbia e sheh në aleancën me Kinën dhe Rusinë”, tha njohësi i çështjeve të sigurisë, Fatmir Çollaku.
E kjo lidhje e tyre sipas Çollakut, është manifestuar edhe me bashkëpunim më të thellë.
“Kontaktet dhe bashkëpunimi në sfera të ndryshme me Kinën dhe Rusinë, Serbisë i shërben padyshim edhe në interesin final në zgjidhjen përfundimtare të çështjes së kontestit në veri… prandaj kjo aleancë është manifestu edhe në forma praktike në kuptimin e armëve, në kuptimin ekonomik me Rusinë, Vuçiqi posaçërisht ka treguar një afërsi shumë të madhe në sfera të ndryshme duke përfshirë edhe atë ushtarake”, u shpreh Çollaku.
Në anën tjetër, njohësi i rrethanave politike, Visar Xani thekson se me këto takime, Vuçiq përcolli mesazhe indirekte tek vendet perëndimore.
“Në udhëtimin e Vuçit në Kinë, në kuadër të forumit “Një Brez, një Rrugë” ky i fundit nënshkroi një sërë ujdish ndër të cilat më e rëndësishmja është Marrëveshja e Tregtisë së Lirë”, theksoi njohësi i çështjeve politike, Visar Xani.
