Të dielën me dhjetëra postierë me imazhin e presidentit serb, Aleksandër Vuçiq, “Komandant Suprem, po ju presim” u shfaqën në pjesën veriore të vendit.
Posterë të tillë me përmbajtje nacionaliste janë shfaqur edhe në të kaluarën në veriun e Kosovës, kur bëhej thirrje për kthimin e ushtrisë serbe.
Profesori dhe analisti, Nexhmedin Spahiu, tregon se çfarë në të vërtetë fshihet mbrapa këtyre thirrjeve.
“Është një gjë shume serioze sepse kjo nënkupton se ka përpjekje të rikrijohen strukturat paralele në veri të Kosovë, dhe ky është një dimension. Ata qe dalin t’i shkruajnë këto marrin guxim dhe kanë dëshirë të dëshmohen se janë të gatshëm të rikrijojnë struktura paralele, andaj është e rëndësishme që të evitohen këto skenarë”, thotë Spahiu për Tëvë 1.
Edhe Kryesuesi i Kuvendit Komunal të Mitrovicës së Veriut, Nexhat Ugljanin, thotë se ka akoma grupe të caktuara në veri që kanë qëllime të tilla në mënyrë që të krijojnë tensione në terren.
“Grafite të tilla kemi parë edhe më herët në pjesën veriore të vendit. Ka disa grupe të caktuara në veri që kanë për synim destabilizimin e vendit, por besoj qe organet kompetente do ta trajtojnë me seriozitet këtë çështje”, shprehet ai.
Zëvendësdrejtori i Policisë për rajonin e veriut, Veton Elshani ka njoftuar se kanë filluar hetimet por se akoma nuk ka persona të dyshuar për vendosjen e postierëve.
“Në disa lokacione të katër komunave në veri të vendit janë shpërndarë pamflete me foton e Presidentit të Serbisë. Pas konsultimit me Prokurorin e Shtetit është hap rasti “Nxitje e Urrejtjes”. Nuk kemi persona të dyshimtë, policia po punon në drejtim të ndriçimit të rastit”, ka thwnw Elshani.
Kurse më nje postim në rrjetin social facebook, ministri i punëve të brendshme, Xhelal Sveçla paralajmëroi arrestimin e Aleksandar Vuçiqit, nëse ai shkel në territorin e Kosovës pa leje të institucioneve.
“I paskan ngjitur tinëz gjatë natës disa postera në veri të Kosovës. Aty thonë që po e presin presidentin e Serbisë të vijë duke e quajtur atë ‘komandant’. Nëse është nisur pa kërkesë te Ministria jonë e Punëve të Jashtme dhe Diasporës, edhe ne po e presim të vijë dhe mandej mund ta vizitoni në burg, ku ai i ka tashmë disa miq të tij“, ka shkruar Sveçla në Facebook.
E Sveçlës i reagoi Kryenegociatori i Serbisë për dialogun me Kosovën, Petar Petkoviq, i cili tha se ministri kosovar po frikësohet me imazhin e presidentit serb, Aleksandar Vuçiq,
Ndërkohë lideri serb, Aleksandar Vuçiq, kishte deklaruar se vetëm po pret të ndryshojnë rrethanat gjeopolitike për të ndërhyrë në Kosovë.
