“Serbia nuk e njeh dhe as nuk do ta njohë pavarësinë e Kosovës”, ka deklaruar presidenti i Serbisë, Aleksandër Vuçiq.
Ai tha se Serbia nuk do ta pranojë asnjë dokument, i cili e detyron që ta ndihmojë Kosovën të anëtarësohet në Kombet e Bashkuara dhe organizatat ndërkombëtare.
“Ne gjithmonë kemi thënë se jemi për një Ballkan të hapur, se nuk kemi asnjë problem me këtë, por gjithmonë do të vendosim ‘disclaimer’, që do t’ua bëjnë të qartë të gjithëve se Serbia s’e njeh pavarësinë e Kosovës. Po e përsëris se Serbia nuk e njeh pavarësinë e Kosovës dhe as nuk do ta njohë pavarësinë e Kosovës”, tha Vuçiq para gazetarëve.
Ndërkohë, presidenti serb, ka përmendur edhe sulmin terrorist në Banjskë më 24 shtator ku u vra rreshteri Afrim Bunjaku.
“Prishtina vazhdon t’i fshehë gjetjet e autopsisë së Stefan Nedeljkoviqit, Igor Milenkoviqit dhe Bojan Mijailoviqit. Ne i kemi lutur ata pafundësisht. Për ne, këta janë njerëz. Dhe ne do të vazhdojmë të kërkojmë të hetojmë se si dhe pse u vranë në gjakftohtësi”, shtoi Vuçiq./teve1.info/
