Presidenti i Serbisë, Aleksandër Vuçiq e ka përfunduar takimin e tij me emisarin e BE-së për dialogun Kosovë-Serbi, Miroslav Lajçak.
Gjetja e mënyrave për qetësimin e situatës në terren dhe zbatimi i marrëveshjeve të arritura në kuadër të dialogut ishin tema diskutimi, ka njoftuar presidenca e Serbisë.
Kurse Vuçiq raportohet se i ka kërkuar sllovakut që të respektohen të drejtat e serbëve në Kosovë dhe BE të jetë më e përfshirë në këtë çështje.
“Edhe një herë paralajmërova se populli serb në Kosovë dhe Metohi është i ekspozuar ndaj torturave dhe persekutimeve më të rënda në 15 vitet e fundit dhe ripërsërita kërkesat për respektimin e të drejtave dhe sigurisë së tyre. I bëj thirrje komunitetit ndërkombëtar që të jetë më konkretisht i përfshirë në të gjitha këto çështje”, shkroi presidenti i Serbisë në Instagram.
