Presidenti i Serbisë, Aleksandër Vuçiq, ka thënë sot në Paris se “një nga një mijë gënjeshtra” është shkrimi i mediave të Sarajevës se Serbia po financon disa media shqiptare në Kosovë, për të cilat më pas ka raportuar nga Radiotelevizioni i Kosovës (RTK).
Vuçiq, i cili ndodhet në Paris me rastin e fillimit të Lojërave Olimpike Verore, duke iu përgjigjur pyetjeve të gazetarëve nga Serbia tha se të njëjtat media kanë njoftuar se ai është takuar në Kragujevc edhe me kryeterroristin Milan Radoiçiq.
“Rastësisht nuk kam takuar njeri në Kragujevc”, ka thënë Vuçiq.
RTK ditë më parë ka publikuar një artikull nga një medium boshnjakë i cili përmend dy media kosovare se financohen nga Serbia për të dëmtuar Qeverinë e Kosovës.
Ky artikull më pas ishte shpërndarë nga disa deputetë të VV-së.
Për artikullin e publikuar janë distancuar edhe disa redaktor të mediumit publik, ndërsa Bordi i RTK-së kishte kërkuar nga menaxhmenti themelimin e një komisioni për sqarim të detajuar të rastit.
Për artikullin e publikuar ka reaguar edhe redaktori i lajmeve, Jeton Musliu, i cili edhe është distancuar nga ky publikim.
Reagime ka pasur edhe nga AGK e disa organizata ndërkombëtare./teve1.info/
