Dhjetëra mijëra njerëz kanë protestuar të dielën në Beograd kundër presidentit serb, Vuçiq. Megjithatë, po vlerësohet se për tërheqjen e vëmendjes, Vuçiq mund të inskenojë skenarë të ndryshëm në veri të vendit.
Dhjetëra mijëra njerëz dolën në sheshin qendror të kryeqytetit të Serbisë, të dielën.
Ata protestuan kundër presidentit serb Vuçiq për një javë ku po kërkojnë përgjegjësi për shembjen e çatisë në një stacion hekurudhor ku la të vdekur 15 njerëz.
Ky tubim i thirrur nga studentët po vlerësohet se mund të ndikojë në aktivizimin e veprimeve të Vuçiq në veri të Kosovës.
Kryetarja e Komisionit për mbikëqyrjen e Agjencisë Kosovare të Inteligjencës,Ganimete Musliu tregon se është vlerësuar se ka indikacione për sulm të mundshëm.
“Krejt çfarë dua të them pa dashur që të hap panik ose frikë tek qytetarët e Kosovës, kërkoj nga organet e shtetit tonë që të jenë vigjilente, të përgatitura mirë dhe mos të lejojnë që të ndodhë asnjë befasi në veri të Kosovës apo kudo në Kosovë. Unë kërkoj që me përgjegjësinë më të lartë që t’i përgjigjen çdo provokimi të mundshëm”, ka thënë deputetja Musliu.
Derisa njohësi i çështjeve të sigurisë, Nuredin Ibishi thotë se historia tregon që veprime të tilla janë të pritshme për ta tërhequr vëmendjen.
“I vetmi që ka ai në dispozicion është lufta hibride duke i infiltruar dhe krijuar situatë tensionuese në vend dhe që ai ka pretendime sikur që është Kosova, Bosnje e Hercegovina, me ekstremistin Dodik por e thashë që rrymës së re pro serbe provuese në Mal të Zi”, thotë Ibishi.
Kurse profesori i shkencave të sigurisë, Avni Islami ka një mendim tjetër sa i përket sulmeve të mundshme të reja në veri.
“Unë nuk pres ndonjë destabilizim të situatës qoftë në aspektin politik por edhe ndonjë incident të mundshëm. Mund të ketë ndonjë aksion simbolik i izoluar por nuk pres që të ketë ndonjë destabilizim për shkak të protestave serbe”, thotë Islami.
Studentëve që organizuan këtë protestë iu bashkuan fermerë, disa punonjës mjekësorë, aktorë, artistë, por edhe banorë të Beogradit dhe qyteteve përreth në Serbi.
