Presidenti i Serbisë, Aleksandar Vuçiq, ka thënë sot se Kosova nuk do ta ketë të lehtë të bëhet anëtare e NATO-s, siç tha ai, për shkak të rezistencës së fortë të Spanjës dhe Hungarisë.
Ai tha se në këtë çështje asgjë nuk varet nga Serbia sepse ajo nuk është anëtare e NATO-s.
“Ata mund të pranohen në NATO, por jo lehtë sepse ka vende anëtare që nuk e njohin Kosovën”. Do të ketë rezistencë shumë të fortë nga Spanja, por edhe nga disa vende që e kanë njohur Kosovën, si vëllezërit dhe motrat tona nga Hungaria”, tha Vuçiq raporton Danas.
Ai po ashtu ka thënë se kryeministri, Albin Kurti po tenton të provokojë konflikte në veri të Kosovës, dhe sipas tij Beogradi nuk do ta lejojë këtë.
“Kemi kërkuar nga Prishtina të cilët çdo ditë po bëjnë probleme të ndalen, të ndalen me të dhe të mos tentojnë të shkaktojnë probleme në veri të Kosovës”.
Tutje ai shtoi se autoritetet serbe kanë njoftuar komandantin e KFOR-it dhe Përfaqësuesin Special të Bashkimit Evropian (BE) për dialogun ndërmjet Serbisë dhe Kosovës, Miroslav Lajçak, për lëvizjet e reja të Prishtinës, hapjen e urës mbi lumin Ibër në Mitrovicë.
