Liderët autoritarë të botës janë mbledhur në Moskë për të festuar 80-vjetorin e mposhtjes së Gjermanisë naziste në Luftën e Dytë Botërore.
Në këtë ceremoni bie në sy edhe prezenca e presidentit të Serbisë, Aleksandar Vuçiq dhe kryeministrit sllovak, Roberto Fico.
Presidenti i Rusisë, Vladimir Putin, para të pranishmëve foli për rëndësinë e kësaj date ndërsa nuk la pa e përmendur edhe luftën në Ukrainë.
Ai u shpreh i bindur në triumfin e Rusisë kundër Ukrainës.
“Rusia ka qenë dhe do të jetë një barrierë e pakapërcyeshme për nazizmin, rusofobinë, antisemitizmin dhe do t’i kundërvihet mizorive të kryera nga përkrahësit e këtyre ideve agresive dhe shkatërruese. E vërteta dhe drejtësia janë në anën tonë. I gjithë vendi, shoqëria dhe populli ynë mbështesin pjesëmarrësit në operacionin special ushtarak (në Ukrainë). Ne jemi krenarë për guximin dhe vendosmërinë e tyre, fuqinë e shpirtit, i cili gjithmonë na sjell vetëm fitoren”, deklaroi Putin.
Nga Brukseli kanë shprehur keqardhje për vizitën e Vuçiqit në Moskë, ndërsa ky i fundit ka thënë se është i gatshëm të përballet me pasoja
Për lidhjet e ngushta mes Putinin dhe Vuçiqit ka folur sot edhe ministrja e jashtme në detyrë e Kosovës, Donika Gërvalla.
Ajo ka kërkuar nga Bashkimi Evropian që të heq dorë nga politikat ledhatuese me Serbinë.
“Fakti që sot presidenti serb, Aleksandar Vuçiq ndodhet në Moskë edhe krahë për krahë me diktatorin Putin demonstron solidaritetin dhe miqësinë e tyre, është një situatë në të cilën bëjmë thirrje që BE të heqë dorë nga politika e ledhatimit e cila ka dështuar që me Putinin, edhe e cila është e destinuar të dështojë edhe me Vuçiqin. Kërkojmë nga BE që të përdorë një gjuhë të qartë, një gjuhë të ashpër, dhe të dënojë jo vetëm këtë vizitë, por edhe të dënojë të gjitha aktet e sulmet që Serbia i bënë ndaj popujve fqinje”, tha Gërvalla.
Për këtë çështje ka reaguar edhe presidentja e vendit, Vjosa Osmani, e cila tha se duhet të trajtohen me seriozitet politikat destabilizuese të Serbisë.
“Në këtë ditë të shënuar, është me rëndësi që, me një zë, të kërkojmë heqjen e masave të padrejta të Bashkimit Evropian ndaj Kosovës, si dhe trajtimin me seriozitet të politikave destabilizuese të Serbisë—të cilat u bënë edhe më të dukshme edhe kur Vuçiq zgjodhi ta shënojë Ditën e Evropës në Moskë, pikërisht te Putini, ai që sot po rrezikon stabilitetin dhe sigurinë e kontinentit tonë”, tha Osmani.
Kujtojmë që Serbia nuk është rreshtuar me sanksionet e BE-së ndaj Rusisë për shkak të agresionit ndaj Ukrainës dhe kanë vazhduar të kenë marrëdhënie të ngushta me Moskën.
