Nuk mundën ta durojnë që ndikimi serb të forcohej” – tha presidenti i Serbisë, Aleksandar Vuçiç, duke komentuar vendimin e administratës së Donald Trump-it për të tërhequr nominimin e Marko Brnoviqit si ambasador në Beograd, të cilin ai e lidhi me lobin e fuqishëm shqiptar në SHBA.
“Lidhja e tretë e Prizrenit na ka sjellë dëmin më të madh në vitin 1946. E formuar në Nju Jork, ky lob është jashtëzakonisht i fuqishëm, në Bruklin, në Manhattan, në të gjithë Uashingtonin. Ata bënë gjithçka që kjo të mos ndodhte. Ndikimi i Brnoviqit do të ishte i madh, jo vetëm në Beograd, por edhe në Bosnjë e Hercegovinë, Mal të Zi”, tha Vuçiq në emisionin e mbrëmjes Hit-Tvit.
I vjen keq. Sipas tij, bëhet fjalë për një njeri të mirë që do të punonte për afrimin e Serbisë dhe SHBA-ve.
Problemin kryesor ai mendon se e ka përbërë Senati dhe shprehu keqardhje për këtë.
“Ashtu siç e shpjegoi edhe zoti Brnoviq – nuk mundën ta durojnë që ndikimi serb të fuqizohej kaq shumë. Nuk mundën.”
Çfarë tjetër tha Vuçiç, lexoni në një lajm të veçantë.
Administrata e presidentit amerikan Donald Trump e ka tërhequr nominimin e Marko Brnoviqit për ambasador në Serbi. Arsyet e tërheqjes së kandidaturës së Brnoviqit nuk janë bërë të ditura.
Trump, në fund të marsit, e kishte nominuar Brnoviqin – anëtar i Partisë Republikane dhe ish-prokuror shtetëror i Arizonës – për ambasador në Beograd. Edhe pse nominimi shpejt mbërriti në Komitetin e Senatit për Marrëdhënie me Jashtë, Brnoviq nuk u paraqit para atij organi që konfirmon emërimet. SHBA nuk ka ambasador në Beograd që nga janari i këtij viti, kur atë pozitë e la Kristofer Hill, pas kthimit të Trump-it në Shtëpinë e Bardhë.
Mark Brnoviq, amerikan me prejardhje serbe dhe ish-prokuror shtetëror i Arizonës, për gazetën Kurir ka komentuar tërheqjen e kandidaturës së tij.
Në deklaratën e tij, Brnoviq tha se para së gjithash dëshiron të falënderojë Trump-in që e kishte nominuar për ambasador amerikan në Serbi.
“Por, meqë procesi u zvarrit, u bë e qartë se burokratët e shtetit të thellë nuk duan që dikush me një prapavijë politike, etike dhe fetare si e imja të ushtrojë detyrën e ambasadorit në Serbi. Kur merret gjithçka parasysh, besoj se fakti që do të jem afër familjes dhe miqve në Arizona dhe do të gjej mundësi për të realizuar një rol më të rëndësishëm në planin vendor, është rruga më e mirë për mua në këtë moment” – tha Brnoviq për Kurir.
