Sipas njoftimit të Policisë së Shqipërisë, i vrari është një 51- vjeçar me inicialet A.M. Ndërsa i dyshuari që vrasjen e ka kryer pas një konflikti për motive të dobëta, dyshohet se është A.P., 37- vjeç nga fshati Stajkë, Vau i Dejës.
“Nga veprimet e shpejta dhe hetimet paraprake të kryera nga Policia, dyshohet se konflikti për motive të dobëta ka nisur në lokalin e fshatit dhe menjëherë shtetasi A.P., ka shkuar në banesë ka marrë armën e zjarrit kallashnikov dhe në momentin që shtetasi A.M. ka hipur në automjetin e tij për tu larguar, shtetasi A.P. e ka qëlluar me armë zjarri”, thuhet në njoftimin e Policisë.
Grupi hetimor nën drejtimin e Prokurorisë vijon punën në vendngjarje për sqarimin e plotë të rrethanave dhe dokumentimin ligjor të kësaj ngjarjeje.
Shërbimet e Policisë janë vënë në ndjekje të autorit dhe vijon kontrolli i zonës për kapjen e tij./teve1.info/
