Ish-kryeministri i Shqipërisë, Pandeli Majko, ka bërë të ditur se Konsulli i Shqipërisë në Ukrainë e ka njoftuar që dy djem nga diaspora shqiptare kanë rënë në luftë.
Majko, ka shkruar se të dy djemtë e rënë kanë qenë ushtarë në ushtrinë e Ukrainës, të cilët kanë luftuar dhe kanë dhanë jetën në krye të detyrës si heronj.
“Ata ishin: Dermentli Anatoly ishte nga fshati shqiptar i Karakurtit (në rajonin e Odesës). Ai kishte lindur më 3 shtator 1980. U mobilizua në Brigadën e mekanizuar Nr.118 në rajonin e Zaporozhias. Në 15 tetor, humbi jetën, në një mision luftimi. Haydarzhy Danylo u lind në një familje shqiptare në 26 janar 2002 në fshatin Georgivka (rajoni i Zaporozhias). Ai ishte fëmija i dytë në familjen e tij, cila aktualisht, jeton ende në zonën e okupuar nga trupat ruse. Kur filloi lufta ai ishte në Poloni. Në verën e 2022, ai shkoi vullnetarisht për tu mobilizuar, por u refuzua (për shkak të moshës). Në vitin 2023 pas ditëlindjes së 21-të ai aplikoi sërish dhe shërbeu vullnetarisht në Forcat e Armatosura të Ukrainës. Ai shërbeu në njësinë ushtarake A290 dhe dha jetën në zonën e luftimeve në fshatin Liman, pranë qytetit Kupiansk, në rajonin e Kharkivit”, ka shkruar Majko në Facebook.
Ndërkohë, ai ka bërë të ditur se dje, janë zhvilluar funeralet e dy të vrarëve, ku tha se pranë flamurit të Ukrainës kanë vendosur edhe flamurin e kombit shqiptar.
“Dje janë zhvilluar në qytetin e Zaporozhias ceremonitë funerale të dy djemve shqiptarë me gjak, të cilët edhe nga fotot personale duket që nuk kanë harruar origjinën e tyre. Në ceremoninë e varrimit pranë flamurit të Ukrainës është vendosur edhe flamuri kombëtar shqiptar. I përjetshëm, qoftë kujtimi i tyre!”, ka shkruar ai tutje./teve1.info/
