Një i ri është vrarë ndërsa gruaja e tij ka mbetur e plagosur të hënën në Podujevë. Policia e Kosovës ka nisur hetimin e rastit, teksa ende nuk dihen motivet e këtij krimi.
Vendi u rrethua me shirita të Policisë së Kosovës.
Ndërsa ekipi i forenzikës mori trupin e pajetë.
Bëhet fjalë për Valmir Breznicën, i cili pas të shtënave me armë ndaj tij, nuk arriti t’u bëjë ballë plagëve.
Ai dyshohej se po qëndronte në market përpara se të ndodhte sulmi.
Një person është vrarë dhe një tjetër ka mbetur i plagosur si pasojë e gjuajtjeve me armë zjarri, sot në rrugën “Zahir Pajaziti” në Podujevë.
Rasti u konfirmua nga zëdhënësi i Policisë së Kosovës, Agron Boroci.
“Sot rreth orës 12:30, është raportuar për gjuajtje me armë zjarri, në rrugën “Zahir Pajaziti” në Podujevë. Policia menjëherë ka dalë në vendin e ngjarjes dhe nga informacionet e para të marra nga mjekët emergjent është konfirmuar se një person është pa shenja jete ndërkaq një tjetër ka mbetur i plagosur. Aktualisht policia po vijon punën me veprime të ekzaminimit të vendngjarjes si dhe me veprime të tjera operativo-hetimore, me qëllim të zbardhjes së rrethanave të ngjarjes si dhe identifikimin e të dyshuarve”, ka deklaruar Borovci.
Vdekjen e Breznicës dhe plagosjen e bashkëshortes së tij e konstatoi edhe Qendra e Mjekësisë Familjare në Podujevë.
“Kemi shku në vendin e ngjarjes dhe kemi gjetë një person të shtrirë me plagë në regjionin e kokës, me gjakosje në regjionin e kokës dhe kemi konstatu vdekjen e tij. Personi tjetër ka qenë femër, shoqja e të ndjerit, me plagë në regjionin e abdomenit plagë shpuese me armë zjarri, e kemi bërë trajtimin e saj, i kemi dhënë ndihmën e parë, e kemi transportu për në emergjencën e Prishtinës. Gjatë rrugës gjendja e saj ka qenë e mirë, me parametra vital në rregull”, ka deklaruar Bedri Hyseni nga Qendra e Mjekësisë Familjare në Podujevë.
Ndërsa Prokuroria thekson se po merret me hetimin e rastit.
Prokuroria në koordinim me Policinë janë duke i ndërmarrë të gjitha veprimet e nevojshme hetimore, për t’i ndriçuar rrethanat e rastit, si dhe identifikuar personat e dyshuar.
Në vend-ngjarje gjatë së hënës ka qëndruar edhe ekipi i Agjencisë për Menaxhimin e Emergjencave.
