Policia e Kosovës e ka zbuluar identitetin e të dyshuarit për vrasjen e rëndë që ka ndodhur 1 muaj më parë në Podujevë.
I dyshuari është Lordi Arsim Sulja nga fshati Gllamnik, por që ka nënshtetësi holandeze dhe për këtë ka kërkuar bashkëpunim nga qytetarët për vendndodhjen e të dyshuarit.
“Kërkesë për bashkëpunim për vendndodhjen personit të dyshuar. Njësiti i hetimeve të përgjithshme që operon në kuadër të Drejtorisë Rajonale të Policisë në Prishtinë, me autorizim nga prokuroria kompetente, kërkon ndihmë nga qytetarët në ofrimin e informatave, të cilat do të ndihmonin në arrestimin e personit të dyshuar.
I dyshuari Lordi Arsim Sulja nga fshati Gllamnik, me nënshtetësi Holandeze, kërkohet për vrasjen e rëndë që ka ndodhur me 11.09.2023, në Podujevë. Të nderuar, për çdo informatë që mund të çojë në identifikimin e vendndodhjes së personit të dyshuar kontaktoni policinë në numrin e telefonit: 192”, thuhet në njoftimin e policisë.
Ndryshe, me 11 shtator 2023, një person rreth 30-vjeç ka mbetur i vdekur ndërsa një grua ka mbetur e plagosur si pasojë e gjuajtjes me armë zjarri në Podujevë.
