Ministria e Drejtësisë ka konfirmuar arrestimin e Xhemajl Nuhiut, i dyshuar për vrasjen e Muhamet Matoshit, e cila ndodhi më 11 gusht në Hajvali të Prishtinës.
Sipas Ministrisë, Nuhiu është arrestuar nga autoritetet britanike në Londër, dhe tashmë kanë nisur procedurat për ekstradimin e tij drejt Kosovës.
Megjithatë, për shkak të natyrës së rastit dhe procesit ligjor, Ministria nuk ka dhënë detaje të tjera mbi hetimet ose rrethanat e arrestimit.
“Ju njoftojmë se procedura e ekstradimit të personit në fjalë do të realizohet sapo vendimi për ekstradim i marrë nga autoritetet britanike të bëhet i plotfuqishëm. Për shkak të natyrës së rastit dhe procedurave ligjore, për momentin nuk mund të ofrojmë më shumë detaje lidhur me këtë çështje”, thuhet në përgjigjen e Ministrisë së Drejtësisë për Tëvë1.
