Një person është gjetur i vdekur në një makinë me targa londineze në Hajvali, në një ngjarje të rëndë që ka tronditur vendin. Sipas dëshmive të banorëve dhe raportimeve nga terreni për televizionin Tëvë1, ngjarja dyshohet të ketë ndodhur pas një konflikti në trafik, dhe pastaj ka filluar përdorimi i armëve ndërsa personi i dyshuar për vrasjen është larguar menjëherë nga vendi i ngjarjes.
Drejtori i Klinikës Emergjente në QKUK, Naser Syla, konfirmoi se viktima kishte plagë nga arma e zjarrit dhe ka mbërritur në spital pa shenja jete. “Në QKUK ka ardhur i vdekur me plagë nga arma e zjarrit,” tha Syla për Tëvë1, duke shtuar se nuk ka pasur shpresa për jetën e tij.
Zëdhënësja e Policisë së Kosovës, Flora Ahmeti, bëri me dije se rreth orës 22:00 është raportuar për të shtëna me armë zjarri në Hajvali dhe se viktima, një mashkull, ka ndërruar jetë në vendin e ngjarjes para se të dërgohej në spital. “Hetimet vazhdojnë dhe jemi në kërkim të personit të dyshuar, i cili tashmë është identifikuar,” tha Ahmeti për Tëvë1.
Sipas dëshmive të banorëve, i dyshuari për vrasjen ka lënë makinën në vendin e ngjarjes dhe është larguar dhe dyshohet se të ketë bërë vetëvrasje pas vrasjes kanë thënë banorët për gazetarin e Tëvë1 i cili ndodhet në vendin e ngjarjes.
Policia vazhdon hetimet intensive për zbardhjen e plotë të rrethanave dhe arrestimin e të dyshuarit. Banorët janë të shqetësuar dhe kërkojnë siguri më të madhe në zonë, ndërsa ngjarja mbetet nën vëzhgimin e institucioneve përgjegjëse.
