Gjykata Themelore në Gjakovë e ka liruar nga akuza Dod Gjikolaj, i cili sipas aktakuzës së Prokurorisë Themelore të Prizrenit, akuzohet për vrasjen e Haxhi Ahmetit me mjet eksploziv në fshatin Smolicë të Gjakovës me 14 tetor të vitit 2018.
Kjo pasi Gjykata nuk ka gjetur prova të mjaftueshme për të vërtetuar se Gjikolaj e ka kryer veprën penale që ngarkohej.
Mirëpo ky vendim nuk ishte fare i pritshëm për familjen Ahmeti.
“Vallahi kem pritë që ka mu dënu, edhe prokurorja pas fjalës përfundimtare para kësaj séance ka thënë se kërkoj dënim maksimum pasi ka dëshmitar ka shkrime që kanë shkru me Dod Gjikolën, ka fakte, ka thënë se po kërkoj dënim maksimum, por sot Ilir Rashkaj e liroi nga të gjitha akuzat”, thotë Gani Ahmeti- djali i viktimës.
Madje, Gani Ahmeti është shprehur i zhgënjyer me drejtësinë pas lirimit nga të gjitha akuzat të Gjikolajt.
“Kam pritë me ardhë drejtësia në vend, po këtu e kom pa që nuk paska drejtësi asnjë pikë, hic hic, se njeri ka qenë dy vjet në arrati u ik nëpër male u ik në Gjirokastër, ka dashtë me ik për Greqi, e kanë arrest, dy vjet si ka ra shtetit në dorë, edhe në fund mu liru i pafajshëm ndaj të gjitha akuzave kjo është tmerruese”, thotë ai.
Ndaj këtij vendimi lirues, avokati i familjes Prek Kola ka thënë se do të bëjnë ankesë, pasi thotë se deklaratat e dëshmitarëve kanë qenë kontradiktore.
“Gjykata ka vendosur me ia falë besimin dëshmitarëve që mbrojtja i ka propozu kinse ditën kur ka ndodhë rasti ky ka qenë në Shqipëri nuk ka qenë në Kosovë, dhe në bazë të asaj që kuptum sot ia ka falë besimin 5 dëshmitarëve të cilët në shqyrtim gjyqësor kanë qenë kontradiktor njoni me tjetrin edhe vetë i akuzumi ka qenë kontradiktor në atë ditë”, tha avokati i familjes, Prek Kola.
Kundër këtij aktgjykimi, palët kanë të drejtë ankese në afat prej tridhjetë ditëve nga dita e pranimit të aktgjykimit në formë të shkruar.
Kronika e realizuar nga gazetarja Gresa Bardhecaj
